U rimpiazzamentu manu militare di u rittore Rémi- François Paolini hè una dichjarazione di guerra à a lingua corsa . L’anu dettu cummenti è critiche purtate contr’à un’ guvernu Macron oppostu di manera ideologica à l’esistenza di tuttu ciò chì ùn hè monolinguisimu ussessiunale. E prime vittime ne sò bella sicura e lingue rigiunale è trà elle, in prima ligna, a lingua corsa, cimentu di un’ populu è di u so drittu à l’autodeterminazione.
Sta decisione ùn hè cà un’ novu episodiu di a battaglia contr’à a diversità linguistica messa in opara ultimamente da l’anzianu ministru di l’educazione Jean Michel Blanquer o ancu da certi associi nemichi di a pratica di u corsu in casa soia cum’è a FCPE di Corsica suttana.
Face pisà dinò un’ risicu micidiale nant’à l’avvene di Scola corsa è di u so mudellu immersivu d’amparera.
Nimu crede chì a nova rittrice sia à prò di u sviluppu, di a dinamica di Scola 2030. Ramintemuci chì stu prughjettu fissava cum’à assu primu u fattu d’ammaestrà a lingua corsa, vista par a prima volta da un’ membru di l’alta amministazione francese, cum’è una disciplina à paru à l’altre è più micca cum’è un’ semplice arnese.
Ramintemuci torna chì issu rittore era statu à l’iniziu di u prughjettu pedagogicu nuvatore d’insignamentu contr’à e pratiche maffiose chì tribbuleghjanu a nostra sucetà sana.
A vera minaccia par sti nemichi di a Corsica è di a so lingua ferma l’ipotesi di l’autonomia è di tuttu ciò chì pudaria custituisce un’ cuntestu suciale è culturale à favore di st’autonomia.
Tocca à noi tutte è tutti militanti di a lingua è difensore di u populu à dimustrà u nostru impegnu in carrughju. Indiemu ci da ch’ella sia purtata à cumpiimentu l’emancipazione cù l’autonomia.
A Manca